أول بوست ... شخصيات وزكريات

وبما إن ده أول بوست فى مدونة إيجى فيس فأنا حابب أخصصه لذكريات و لشخصيات عرفتهم فى الفيسبوك أوحصلت مواقف جميله معاهم
شخصيات أثرت فيا جامد جدا بحهبم جدا وبقدرهم .. ربنا يبارك فيهم دايمن يارب

أميره محمد محمد محمد : إستاذتنا طبعا ،، أعرفها تقريبا من سنتين إلا شويه بس بحس إنى أعرفها من زمان قوى ،، عملنا شغل كتير قوى ع فيسبوك سوا فى وقت كنا بندير أنا وهى أكتر من 13 جروب مابين سياسيه وثقافيه وتدوين ،، إتعلمت منها حاجات كتير قوى ، صبر وصمود وعزه وده غير الأفكار إللى كنت بستفيدها منها عندها ثوره وإراده لو إتوزعت ع بنات الأخوان كلهم تكفيهم ويزيد ،، فى مخيلتى دايمن هى الصوره الأمثل للفتاه الأسلاميه المعاصره >> ذكاء ، فكر ، مبادئ ، إراده ، عمل ، ومن قبل كده ده أخلاق حقيقه مش أخلاق مظاهر زى ما بنشوف ،، دكتورة أميره هى الوحيده إللى بسمحلها تعدل ع الحاجه إللى أنا بعملها لأن نيتها خالصه دايمن وهى أهم حد عندى بثق فى تقيمه ليا .

إسراءالطويل : لما عملت مبادرة لا للفرانكوأراب كنت محتاج بوستر للمبادره بعت رساله للأعضاء فى الجروب لو حد يعرف يصمم لنا بوستر نشتغل بيه ,, وكلها نص ساعه ولقيت واحده باعته بوستر جميل جدا ويفوق المواصافات إللى كنت محددها فى الرساله ,, عملتلها أدد وكنت متأكد إنى أعرفها قبل كده أو سمعت إسمها فى مكان ما وأخيبرا إفتكرت كانحد فى الجايكو بيتكلمعنها قبل ما أعملها الأدد والبوستر .. هى حد عنده طاقه كبيره جداومحترم جدا ومش بتحب تقول لا على حاجه ومش بترفض طلب لحد خالص أينعم ممكن تطنشك كتيير بس مابتقولش لا ^_^
إنتشرت بين الأصدقاء عندى بسرعه طبعا لخفة دمها ومشاركاتها الجميله جدا وأنا بعاذرلها إذا كان حد وصلها عن طريقى وأساء ليها أو ضايقها ولو لحظهواحده
بقدرما هى حد كويس جدا بس هى عملت معايا حاجات لو حد غيرها أنا كنت عملتله بلوك من الوجودمش بسمن الفيسبوك وكده بس فى الأخر هى إسراءالطويل إللىماينفعش أزعلمنها أو أزعلها أبدااااااااااا

أسماء الخطيب : أسماء محمود وساعات محمد وساعات وساعات وساعات ... كانت دايمن تسئل عن أى حاجه وعايزه تعرف هى إيه وليه وفين ماكنتش أعرف إنها مشروع صحفيه ناجحه بإذن الله ،، أول مره قابلتها لطعتنى بتاع ساعه فى سوهاج وكان معانا خالها وإختها (الشقيه جدا) إستاذه خديجه ،، بس بصراحه أسماء دى جدعه قوى طبعا عشان أهلها صعايده وكمان بلدياتى أنا ،، تعتبر واحده من أهم كتام أسرارى وهى أمينه جدا ،، ربنا يكملها بعقلها .

أسماء خليفه : مره جاتنى صداقه وقبلتها وبعدها فى البروفايل ببص لقيت واحده كاتبه ليا هو إنت بقى محمد عاطف إللى بيقولوا عليه ده كان بالظبط فى وقت إنتشار الأستطلاع بتاع رئاسة الجمهوريه ومين أفضل أنا ولا جمال مبارك وكنت مكتسح وقتها ،، دى بقى كانت أسماء خليفه حيث خفة الدم والروح وطيبة القلب والألتزام والجدعنه والأخلاق ،، مش لاقى كلام كتير أكتبه عشان هى فعلا تستحق أكتر من كام سطر عشان أكتب عنها .

أسماء محفوظ : أول مره إتكلمت معاها وقت ما كان البيت عندها بيعارضوا نشاطها السياسى وكان أخوها بيقولها أراء كده غريبه شويه ،، المهم هى حد بجد من كلامها يتفتح لها قلبك وتحس إنها إختك الكبيره من زمان ،، أجمل حاجه فيها إلتزامها ونشاطها وإرادتها الكبيره جدا ،، بحب جدا صورتها وهى ماسكه السكينه ربنا يحوش سكاكينها عنا ^_^ .

إيناس حسنى : إستاذى القديره جدا ،، عرفتها فى فترة تواجدنا سوا فى 6 إبريل (أيام ما كانت 6 إبريل 6 إبريل) أكتر حاجه إتعلمتها منها إنى إزاى أخد موقف ومايهمنيش نتايجه طالما أنا واثق من نفسى ،، مع إنى أكبر منها بسنتين بس بحس دايمن إنها أكبر منى وفاكر لحد دلوقتى صدمة لما عرفت إنها أصغر منى ،، من خلال معرفتى بإيناس عرفت بجد يعنى إيه جملة بنت بعشر رجاله .

باسم فتحى : دخلت مره توبيك فى جروب سرى لشباب 6 إبريل (المطبخ يعنى ^_^) لقيت واحد كاتب بوست عباره عن حلم هو حلمه وفيه كل الناس إللى فى الحركه إلا أنا كنت جديد وقتها فبقوله إزاى أنا أسمى مش مكتوب قالى ما أنا ماعرفك لسه وأنا من وقتها وأنا نفسى أعرفه مع إنه كان لازم يحط مكان فاضى فى حلمه للناس الجديده ،، وقابلته أول مره فى طنطا (فى جلسات عمال المحله) وهكذا وهكذا وهكذا ... باسم فتحى ده حد بستمخ جدا لما أشوفه حد كده عنده دماغ بجد وكفايه قوى التشجيع بتاعه ،، كان نفسى جدا يكون عندى أخ شبهه ف الشكل والشخصيه والتفكير من زمان بس هو بالنسبه ليا أكتر من أخ .

عوومر رضا وياسر سيد : ولأن الأتنين دولا عرفتهم مع بعض فامينفعش يتفرقوا أبدا عن بعض ،، رجاله رجاله بجد وجدعان جدا عندها أحلام حلوه وإمنيات خالصه لربنا ربنا يكرمهم يارب وياريت بلدنا فيها كتير من الثنائى ده كانت حتفرق كتير جدا ،، بس ياريت ماحدش يتحشر بينهم وهما مايدوش ودانهم كتير لحد .

محمد جمال : مره كده عند إسراء الطويل فى بروفايلها بنتناقش فى حاجه ودخل واحد قال حاجات نرفزتنى جدا وقتها رحت عملتله بلوك ،، إكتشفت بعدها بخمس دقايق إنى كنت مشحون وما كانش يصح إللى أنا عملته ده وإكتشفت إنه هو ده برضو ميدووو إللى بحبه جدا ع جايكو وتويتر .

محمد عاطف (ميكى) : ده حصل مشاكل بينى وبينه مالهاش عدد عشان حاجات كتير بس فعلا أثبتلى إنه أرجل من ناس كتيره جدا وشهم وجدع وطيب قوى قوى قوى قوى قوى قوى قوى قوى بس لو يبطل نظرته السوده عن الأخوان ^_^ يوم 4 مايو كان زعلان منى وقابلته وجيت أصالحه مديت إيدى رفض يسلم عليا (الواطى) وبعدها إتمسك وإتظبط من جوه (أحسن) ^_^ ده نصى التانى وشبههى فى حاجات كتير حتى إسمى .

محمود سامى : فى حاجه كده زمان حصلت (لا يجوز ذكرها علنا) أثارتنا جدا لدرجة إننا قررنا إننا نأدب صاحبها ده جدا بس ف الأخر طلعت أكذوبة أبريل ^_^ كان شريكى ف التأثر الواد ده واد جدع وشهم وأخلاق ورجوله دايمن بحسه إنه إتولد ف بحرى بالغلط الواد ده إنتاج صعيدى خالص ،، وأحلى حاجه فيه إنه بيفهمنى من غير ما أقول حاجه وأجدع واحد بلاقيه جمبى ف كل وقت وأكتر حد بيستحملنى برضو وكمان إستاذى .

مهره الغزالى : كنت فى إستيتس حسام فؤاد قبل ماتش الأهلى والزمالك (قبل قبل قبل قبل الأخير) وزنقته وقتها مش لقى حاجه غير يكتب إستيتس جديده يستنجد فيها برفاقه الزمالكويه دخلت مهره وصديقه تانى وبقيوا ضدى وعملنا إستيتس وقتها كان جميل جدا وبعدها عملتلها أدد كانت حد جميل جدا وبتشارك ع طول عندى وماكنش فيه أصدقاء مشتركين بينا غير حسام فؤاد بعدها بفتره ناس كتير جدا من عندى بدأت تضيفها وهى وقتها كانت مش حابه الحكاية دى إن ناس كتير جدا بتبعتلها أدد وأنا بس بكون المشترك عندهم ،، كانت بتسئل دايمن وتتطمن تحس كده إنها حد كبير وإنت مسئول منه ،، من فتره كبيره حذفتنى بدعوى إنها حذفت كل أصدقائها الولاد وبعد كده إكتشفت إنها رجعت عدد كبير منهم إلا أنا تقريبا أنا إتمنعت بناء ع طلب شخص ما .. عموما هى حد كويس جدا وربنا ينورلها طريقها كمان وكمان يارب .

هدير محمد : كنت ذات ليل بتصفح بروفايل واحد صاحبى لقيته عامل كومنت عند واحده صورة بروفايلها واقفه مع حماقى بذات نفسيته دخلت عندها وعملتلها أدد كانت حد دمه خفيف جدا وبتشارك وبتسئل عن أى حاجنا حسيت فيها حس سياسى واعى جدا ومتفتحه جدا فبدأت أناقشها فعلا وأتعمد أكتب حاجات عشان هى تشارك فيها وفعلا إستقطبتها لشباب 6 إبريل (ومحدش له دعوى بقصة حشدها دى حكايه لوحدها ^_^) هى هدير محمد إنسانه جدعه شهمه رقيقه حساسه جدا عندها وعى ودماغ عاليه جدا وقلبها كبير قوى ،، بفتخر دايمن إنى دخلت حد زيها العالم ده وبقدر فخرى ده قدر خوفى إنها تنجرح فيه أو حد يضايقها لأنها ببساطه بنتى وإختى .

ناس بجد بحبهم :-

خالد فوده : فيه حاجات كتير منى ، وهو حد جدع جدا

عمرو إسامه : واد دماغه عاليه جدا ونضيفه بجد محتاج شوية هدوء كده وراحه وحيطلع أفكار مالهاش حل .

سوكه : بالهه مش بالألف حد مخلص جدا وصاحب صاحبه بجد

أحمد الغيطى : رفيق الكفاح السلمى والمسلح برضو ..حبيب قلبى

صدومه : واحشنى قوى الواد ده

أحمد شهيب : حيث تكون الدماغ الرايقه والجدعنه يكون أحمد شهيب

إميمه الشريف : حيث تكون الأراء المحترمه والمشاركات القديرة والأدب والأخلاق العاليه إميمه الشريف

سمر جمال : حد كويس جدا وفيها كتير جدامن أسماء الخطيب ما جمع إللى ما وفق بصراحه ربنا يخليهم لينا بقى

وبس كده كفايه ونكمل المره الجايه